(اله الدوله الملحده)
-
السلام عليكم .. كل عام وانتم بخير .. بمناسبه اقتراب عيد الفطر المبارك .. واتمني ان تكونو قمتم ب استغلال شهر رمضان المبارك بالدعاء والمغفره لانفسكم وللمسلمين
ندخل ف الموضوع :")
سنه 1843 الفيلسوف الالماني كارل ماركس احد اهم علامات التاريخ المعاصر يكتب جملته (الدين مخدر الشعوب) علي حد فهمي مارك كان شايف ان الدين من صنع الشعوب .. وان الاديان م هيا الا وسيله للحكام والاغنياء علشان الفقراء يستحملو ويصبرو نفسهم علشان ميعملوش ثوره .. علشان كده ماركس كان شايف ان التخلص من الدين واجب علي الشعوب .. للتخلص من الراس ماليه .. وان الدين كان حاجز بينه وبين ثورته الشيوعيه الي المفروض تساوي بين الاغنياء والفقراء .. المهم سنه 1917 ينكسر هذا الحاجز .. تحصل الثوره الروسيه المشهوره ب اسم (الثوره البلشفيه) البولفشيك ... الي فيها يظهر القائد فلاديمر .. ويمشي علي نهج ماركس في تحويل روسيا الي دوله شيوعيه ..
وتحويلها الي دوله ملحده ... الدوله الملحده علي عكس الدوله العلمانيه بتاكد علي عدم ممارسه العبادات .. علي الاستحواذ علي الممتلكات والمؤسسات الدينيه .. علي نشر التعاليم الي بتنافي الدين .. الاتحاد السوفيتي في العشرينات مثلا (1920) كان هناك م يسمي ب (league of militant atheists ) كان ليهم منشورات ومؤتمرات .. وكانو بيمارسو الدعوه الالحاديه ..الحركه دي كان فيها 3 مليون انسان لحد عام 1941 فيه الاف اتسجنت وماتت لنشرها افكار دينيه لدرجه ان الاسبوع عندهم في فتره من الفترات كان 6 ايام فقط .. غيرو في التقويم الميلادي المسيحي ! وده الي خلاهم يقتلو مسيحيين بالملايين ..
وواحده واحده الفكر الشيوعي كبر ووصل للصين .. ملحدين الصين كانو اكثر عنف .. كان هدفهم برضو يقضو علي الدين وفي الثوره الصينيه الحضاريه سنه 1961 يحرقو كتب ويهدو دار عبادات وياذو مصليين .. المهم الي عاوز اقولو ان نفس الكلام ده حصل ف الصين .. الزعيم الصيني ماو سي تونج يبدا الثوره الحضاريه ف الصين (طبعا لو انتا بتعتبرها ثوره) وتتحول الدوله الصينيه لدوله ملحده هيا كمان .. ولحد النهارده اكبر دوله ملحده ف العالم هيا الصين ومازلت الدوله لحد النهارده بتفرض ان الي يخش الحزب الاحمر (الحزب الشيوعي الحاكم ف الصين) المفروض يبقا ملحد .. ولحد النهارده النشطاء بيقولو ان فيه حوالي 1700 كنيسه تم تدميرها ف الصين .. ده غير التضييق علي المسلمين وفرض عدم الصيام عليهم وعدم تطويلهم للدقن وعدم لبس النساء للنقاب الخ .. وعلي حسب تقرير جالوب انتر ناشيونال نسبه الملحدين في الصين 67% يعني حوالي 1 مليار انسان ... المهم الي حابب اقولو ان دوله الصين بتحاول تشيل من عقول المواطنين فكره الاله الي بيحاسب علي المعاصي .. وبيكافئ علي الحسنات .. وحاليا عاوزين يعملو نموذج للاله !
لا شك ان الصين النهارده بتعمل تقريبا كل حاجه .. 60% من الاحذيه بتتعمل ف الصين .. 70% من الهواتف معموله ف الصين .. 80% من المكييفات بتتعمل ف الصين ..فيه مدينه ف الصين اسمها شين زين .. مدينه من 18 مليون مواطن .. علي حدود هونج كونج .. حجم اقتصادها يقدر ب حوالي 300 مليار دولار .. يعني تقريبا قيمه اقتصاد مصر كلها
النهارده الصين اكبر مصدر ف العالم ب حوالي 2 تريليون دولار .. بعدها ع طول امريكا ب اقل منها ب نص تريليون دولار .. ف فعلا الصين عملت كل حاجه .. وصدرت كل حاجه .. ناقص يبقا عندها اله ! .. وهتغير مفهمونا عن الدوله الحديثه .. الفكره بسيطه جدا .. الفكره ان احنا بنعقد علي الهاتف واللاب توب .. وقت كبير جدا .. وبنستخدم مواقع زي فيس بوك وجوجل وخدمات زي اوبر وامازون الخ .. كل المواقع الي بتديم هذه الخدمات بتاخد شويه معلومات منك علي هيئه داتا .. بيعرفو عننا كميه معلومات جباره .. معلومات زي السيرش الي بتعملها النهارده مثلا .. والمشتريات الخاصه بك .. مشاويرك .. كل دي حاجات متسجله .. الحاجات دي بتحتفظ بالحاجات دي لنفسها او بتبيعها لمعلنين .. لاكن مفيش فكره انك تقيم المواطن عن طريق هذه المعلومات ! لاكن الي بيحصل بقا في الصين ان المعلومات دي بتتجمع عن المواطن وبتستخدم في انها تعمل رقم يقيم المواطنين اجتماعيا .. الحكومه الصينيه شغاله مع 8 شركات بحيث انها من المعلومات الكتيره دي تقدر تقيم اي انسان عندها .. يبقا فيه درجه اجتماعيه للانسان .. تحدد ثقه الناس والدوله فيه .. وعلي اساس هذه الثقه تقدر تاخد قروض اسهل او تخلص فيزا اسرع .. والكلام ده بقا مش لسه ف 2050 مثلا .. الكلام ده حاليا اختياري .. وفي عام 2020 علي حسب المعلومات هيكون اجباري .. بس حتي حاليا وهو اختياري مازال شغال في فبراير 2017 الحكومه الصينيه منعت 6 مليون انسان من السفر عن طريق الطائرات .. مليون ونصف انسان من ركوب القطارات علشان اخطاء اجتماعيه علي السوشيال ميديا ! .. وانتا احيانا بيتم تقييمك علي مشترياتك ! وانتا لو روحت تشتري بامبرز يبقا انتا غالبا اب مسؤل .. يبقا هنديك تقييم عالي تعلي بيه التقييم بتاعك .. لو اشريت العاب يبقا انتا غالبا انتا شخص غير مسؤل يبقا هنديك سيئه تقلل من تقييمك .. والتقييم العالي ميزته تسهيل ف الاجراءات .. والواطي بطيء ف الخدمات .. متخيل ! .. الحكومه الي المفروض انها شيوعيه .. بتتعاون مع شركات الي المفروض راس ماليه .. علشان يعملو نموذج للاله !! لدوله ملحده .. ومش بس كده ... درجاتك انتا بتتاثر ب الي بيعملوه صحابك ! وعلي حسب وصف الصحف الامريكيه المواطن بيتحول جزء من لعبه .. اهم حاجه فيها الاسكور العالي الي الدوله بتحددها .. الديكتاتور الي ماسك الدوله دلوقتي مبقاش يوقف يمسك العصايه للشعب .. بقا الشعب هو الي ماسك العصايه لنفسه ... وقدمنا سنتين وهيبقا فيه مليار و 400 مليون انسان جزء من لعبه !
المخلص علشان الموضوع طول جدا .. ان بقا فيه تغيير عوالم .. بنتحرك من عالم مادي محسوس نسميه (واقعي) ل عالم فيه شيء من الماديه المحسوسه بنسميه (رقمي) العالم الرقمي ده تقريبا بيسجل كل حاجه .. لاكن مع دخول الصين .. بتتحول عمليه التسجيل دي ل عمليه تسجيل صح وغلط وبعدين ف الاخر يقوم مطلعلك رقم زي تقدير ليك تقدر تتعلم بيه تقترض بيه تتجوز بيه الخ .. فعلا دي حاجه مرعبه .. تخيل فعلا يبقا ليك رقم ! رقم اجتماعي بيمثلك قدام مجتمعك وحكومتك .. من غير م يتحط ف الحسبان اي حاجه تشرح الرقم ده ! .. انا مش بقول ان دي حاجه وحشه او حلوه .. كل دي ادوات .. لا شك ان احنا بالتاكيد بنتعرض ف حياتنا لحاجه زي كده .. درجاتنا ف المدرسه مثلا .. لينا حتي درجات ف البنوك علشان نقدر نقترض .. وخطوه زي دي مفيده جدا لكتير من المواطنين ف الصين علشان يقدرو يقترضو .. بس انا عايزك تتخيل الدنيا ممكن تروح ع فين
اسف ع الاطاله بالتاكيد واتمني ان يكون الموضوع عجبكم او ضاف ليكم معلومه علي الاقل .. بالتوفيق !
-
ويلكم باك ي مزيكا
الموضوع حلو بس حاسس اني قريت حاجه شبهوو ف فيديو من فيديوهات الدححيح ع يوتيوب بس
معلومات حلوه , وحاول تحسن التنسيق يسطا انت كنت مبدع زمان :"D -
عاش ي مزيكا مضمون جميل , بس زي م قال فادي انا كنت بقرا فيديو من برنامج الدحيح بس
واصـل -
@فادى-عمرو ربنا يخليك ي برو .. اها اغلب المعلومات من الفيديو اصلا ..
انا مبفهمش ف التنسيق ف المنتدي ده بصراحه@ordni5 said in (اله الدوله الملحده):
موضوع جميل لكن غير مفيد للأعضاء على ما اعتقد
لو تحسّن التنسيق شوي بصير احسنبالتوفيق
لو مهتم ب امور مثل التطور العلمي وغيره هيفيدك .. .. مبعرفش اعمل تنسيق وكسلت اجرب