( الاشتراكية )



  • السلام عليكم ورحمه الله وبركاته ..
    اهلا بيكم في موضوع جديد عن فكر الاشتراكيه .. سلسله ان شاء الله ممكن اكملها لو كان لينا عمر .. النهارده عن الفكر الاشتراكي ثم الفكر الشيوعي ثم الفكر النيوليبرالي 🙂 اتمني ان المواضيع دي تديكم فكره عن الاحزاب دي .. وتدوني وجهه نظركم وهل ينفع نطبق الافكار دي في بلادنا التعيسه ولا لا !

    اي حزب سياسي منافس علي الحكم بيجي في الحكم بعقد اجتماعي مع الشعب .. او خلينا نقول وعد اساسي بتوعد بيه الناس وعلي اساسه الناس بتقرر هتنتخب الناس دي ولا لا ما بين اكثر من حزب مرشح .. بتيجي تقول حريه مساواه استقلال عدل .. الخ .. ودي الطريقه الي هقيم بيها 🙂

    وندخل ف الموضوع .. وهو الاشتراكيه .. الاشتراكيه زي م بيقول الكتاب هو الاشتراك في ملكيه عوامل الانتاج .. ان عوامل الانتاج زي المصانع والمزارع والالات تبقا بتاعتنا كلنا .. يعني الشعب من خلال الحكومه هو الي يملك ويدير الموارد لحسابه .. المبداء ده مبداء مطاط اوي وبالتالي منقدرش نحط ايدنا بالظبط امتي ابتدي التفكير فيه ..لاكن نقدر نقول ان مباديء الاشتراكيه كانت ظاهره من اول كتب ارسطو وافلاطون وانتا جاي .. وحديثا نقدر نقول قصاد ماركس ولينن بتوع الفكر الشيوعي (الي هشرحه ف موضوع لوحده ان شاء الله) ف فيه روبيرت اوين .. وتشان شيمون .. وتشارليز فور يي ... واذا حاولنا نشوف مين الي كان بيقول ع نفسه اشتراكي ف هنلاقي ناس كتيره اوي .. الحزب الديموقراطي ف السويد .. والحزب الديمقوراطي الاشتراكي (حزب العمال) ف الدنمارك .. وهتلر كان اسم الحزب بتاعه الحزب القومي الاشتراكي .. وفي فنزويلاا ايضا الحزب الاشتراكي .. ده حتي الاتحاد السوفييتي الي كان بيحكمه شيوعيين ( كان اسمه اتحاد الجمهوريات السوفيتيه الاشتراكيه ) .. الفكر الاشيوعي والفكر الاشتراكي .. هما الاتنين ظهرو ك رد للفكر الراس مالي الصناعي .. وهما الاتنين طلعو يطالبو بحقوق العمال .. وتوفير حياه كريمه للناس كلها .. الي قادر والي مش قادر كله هياخد

    بس ف الوقت الي طالبت فيه الاشتراكيه ب اعاده توزيع الثروه لتقليل الفروق بين الطبقات .. كان الشيوعيه بتطالب ب نزع الثروه والغاء الملكيه الفرديه والغاء الطبقات تماما ... وفي الوقت الي كانت الاشتراكيه بتطالب فيه ب زياده التخطيط وزياده دور الدوله في الموارد .. كانت الشيوعيه بتقول الدوله بس هيا الي تدير والدوله بس هيا الي تخطط ... الهدف عند الاشتراكيين هو تقليم اظافر القطاع الخاص .. مش قطع ايدهم زي الشيوعيين .. وبالتالي بقت الدول الاشتراكيه بتحط تشريعات وقوانين تكتف بيها السوق علشان تحكي حقوق العمال .. تاخد ضرايب من الي معاهم فلوس علشان تعمل بيها مشاريع قوميه حسب اولويات الدوله .. وبقت تعمل شركات ومصانع وبنوك وتنزل تنافس ف السوق علشان توفر المنتجات للمواطنين ب اسعار معقوله .. وتعمل تسعييره للسلع الي ف السوق علشان مش كل تاجر يضرب السعر الي ع مزاجه .. ولان الفكره الي كانت مسيطره ع الاشتراكيين ان السلطه دايما متحيزه للاغنياء .. حاجه من الاتنين .. ان الي ف السلطه استغلو السلطه علشان يبقو اغنياء او ان الاغنياء بيسطرو علي الي ف السلطه علشان يقاسمو معاهم .. ف كانت فكره الثوره ع السلطه والتغيير الجذري هيا كانت الفكره السايده عند الاشتراكيين .. ودول الي اسمهم ( الاشتراكيين الثوريين ) . فضلت الفكره دي هيا السايده عند الاشتراكيين لحد ظهور الديمقوراطيه وبقا ممكن ان الشعب كله يختار الي يحكمه ما بين احزاب متنافسه ..ف شارك الاشتراكيين بالاخص ف اوروبا الغربيه وشاركو ف اللعبه السياسيه وعملو احزاب وبقو ف حكومات ودول الي اسمهم ( الاشتراكيين الديموقراطيين ) زي حزب العمال ف بريطانيا والحزب الديموقراطي الاشتراكي ف المانيا .. والحقيقه الي ظهور الديموقراطيه مش بس أثر ف الاشتراكيين .. ده كمان أثر ف بعض الشيوعيين .. الي كان من مبادئهم الثوره وبعدها ديكتاتوريه البلورتريا .. الجماعه دول راحو صلو ع النبي كده وهدو اعصابهم وعملو احزاب هما كمان وبقو بينافسو بشكل ديموقراطي وفكوهم من موضوع الثوره مستمره والكلام ده .. يعني من الاخر وعلي عكس الشيوعيه .. ف الاشتراكيه كلو بالحنيه بيفك 😄

    لاكن فيه حالات مش كتير ه اوي لما الدوله الاشتراكيه بتتزنق ف حرب او ازمه اقتصاديه بتبقا تكشر عن انيابها .. وتلجا ل تاميم قطاعات معينه علشان تخرج من المزنق الي هيا فيه .. زي م حكومه حزب العمال الاشتراكيه ف بريطانيا ف 1945 و 1951 م اممت صناعات الفحم والصلب والكهرباء والغاز وسكك الحديد .. وفرنسا اممت شويه من شركات الفحم والكهرباء والبنوك في نفس الفتره تقريبا بعد الحرب العالميه التانيه .. ولما رجع الاشتراكيين تاني للسلطه ف التمانينات (1980) اممو تشكيله حلوه برضو من الشركات والمصانع والبنوك .. لكن للاسف التاميم ده كان عبيء علي الدوله وسبب ف زياده الاستدانه مش لحلها .. مع الوقت بقا فيه احزاب اشتراكيه مؤيده لفكره السوق .. ان مفيش تخطيط للسوق وكل واحد ينتج الي هو عاوزه .. وممكن يعني يشجعو شويه صناعات ويدعموها .. لكن بيسيبو المنافسه تولع بين القطاع الخاص وبعضه .. ويبقا البقاء للاصلح .. ويسيبو الناس بقا تعمل الفلوس الي هيا عاوزاها لكن بعدها الدوله بتروح واقفالهم ع باب السوق كده وتقولهم ايه .. تعالو وروني كده كسبتو كام .. هاتولي منهم حبه .. وكل م مكسبك يزيد كل م كانت النسبه الي بتتاخد منك اعلي .. مثلا لو كسبت 10 هياخدو منك 1 ويسيبولك 90 .. طب لو كسبت 100 هياخدو منك 10 ويسيبولك 90 ؟ لا ! هياخدو منك 30 ويسيبولك 70 .. طب لو كسبت 1000 ؟ هياخدو منك 300 ويسيبولك الباقي ؟ لا هياخدو منك 600 ويسيبولك 400 ودي الي بيسموها ( الضريبه التصاعديه ) .. طيب معلش اصل ده موسم استثنائي ده انا عندي حاجه منتج جديد .. هات وانتا ساكت .. ابقا روح اعملك منتج تاني جديد زيه .. اصل المكسب ده مش هيطول دي بس علشان فيه موضه السنادي .. شخلل ي بلدينا علشان تعدي متزعلنيش منك ! ... وزعل الدوله ف موضوع الضرايب ده بيبقا وحش اوي .. الدوله خلعت من خناقه السوق وسابتو يطحن ف بعضو زي م هو عاوز .. وبقت تقلب الضرايب من الاغنياء علشان تمول ب دوله الرفاه .. الي فيه المواطن بيضمن احتيجاته الاساسيه .. تأمين صحي .. تعليم مجاني .. دعم للعاطلين والفقراء .. الخ .. كلو ده بيحصل وعينهم برضو علي العامل .. يتاكدو انه بيشتغل ف ظروف أدميه .. بيشتغل عدد ساعات محدده .. وبياخد اجازاته .. ومحددله حد ادني للاجور مياخدش اقل منه .. ودول الي بسموهم يسار الوسط .. دول بتوع سوق ؟ قشطه سوق .. بس هنقلبه .. وناخد منهم الفلوس نشبع بيهم الغلابه علشان يبقو متطمنين ان الدوله ف ضهرهم وبتدعمهم .. ويبقو مش محتاجين للفلوس اصلا لان احتيجاتهم الاساسيه متوفره .. وكل المطلوب منهم ببساطه كده انهم يشتغلو ويبدعو .. وصحيح لو ابدعو والفلوس جريت ف ايدهم هنقلبهم زي م قلبنا اخواتهم قبل كده .. بس هيبقو عارفين ان الفلوس دي هتلف ف دايره مقفوله وهترجعلك بشكل مباشر او غير مباشر .. هترجعلك قوه شرائيه عند الغلابه الي اخدوها ويلفو ويرجعو يشترو من عندك تاني .. وهترجعلك خدمات تاخدها ببلاش .. وهترجعلك مجتمع متعلم مثقف شبعان .. وتبقا متطمن ع نفسك وعيالك وانتا عايش ف وسطهم .. الكلام ده كلو ع الاشتراكيه بتاعت بلاد بره .. لاكن الاشتراكيه بتاعت بلاد جوه وضعها مختلف تماما لان الدوافع والظروف كانت مختلفه .. مكنش فيه عندنا راس ماليه صناعيه .. وكانت طبقات المجتمع عندنا شكلها مختلف كتير عن الموجوده ف الغرب .. لاكن الي كان عندنا .. كان فيه عندنا محتل وكان فيه عندنا تفرقه عرقيه .. ف اختلط الكفاح ضد المحتل بالقوميه العربيه بالفكر الاشتراكي .. وطلعلنا خلطه كده لوز العنب صعب ان احنا نناقشها دلوقتي لانها محتاجه موضوع لوحدها 😄

    وتعالو دلوقتي نقيم الاشتراكيه ( الاشتراكيه بتاعت بلاد بره )
    هما قالو عاوزين اشتراكيه ليه ؟

    • زياده دور الدوله في زياده وتخطيط الاقتصاد ( الاقتصاد المخطط )

    • مراعاه حقوق العمال والحد من استغلاالهم ( حقوق العمال )

    • اعاده توزيع الثروات ل تقليل او الغاء الفرق بين الاغنياء والفقراء ( توزيع الثروه )

    • توفير دوله الرفاه ( دوله الرفاه )

    • ونبداء الاول ب زياده دور الدوله ف التخطيط وعوامل الانتاج ( الاقتصاد المخطط )

    نظريا الموضوع ممتاز جدا .. لان ع مستوي اداره الدوله والمصلحه العليا .. ف الدوله هيا الجهه الوحيده فعليا الي قادره انها تبص ع كل السلع والخدمات الي محتاجها الشعب ب شكل عام وتحدد ايه الاولويه .. يعني مش هتسيب حاجه رائجه ف السوق تخلي السوق كله يميل ل نحيتها ويهتم بيها وينسي باقي الحاجات الي ممكن تكون اهم للدوله ك دوله عاوزه تكون مستقله ب نفسها وعندها اكتفاء وناسها مبسوطه .. والدوله هيا الوحيده الي قادره فعلا ع انها تدمج نظرتها للواقع الاقتصادي للواقع الاقتصادي مع بعض .. يعني هيا الي عارفه مين العدو ومين الصديق سياسيا .. وبناء عليه عارفه مين ممكن نعتمد عليه ف شيء معين ... ومين الي نقدر نستغل امكانياتنا علشان ناثر فيه سياسيا .. وهكذا .. ف تقدر تستغل القدرات الاقتصاديه للتاثير السياسي والعكس .. ف علي مستوي مصالح الافراد ف لان الدوله معندهاش جشع التجار .. ف الموظفين هيشتغلو ف ظروف كويسه والسلع تتباع ب اسعار كويسه .. وكده تبقا الدوله وفرت وظائف للشعب والمكاسب هتتصرف ع رفاهيه الشعب برضو .. المشكله ان الدوله علشان تعمل كده ف قدامها خيارات اصعب من بعض .. اول اختيار عندها انها تنشيء مصانع وشركات من الزيرو .. بس مشكله ده انه هيشفط موارد الدوله .. اذا كان عندها موارد .. او يورطها ف ديون لو معندهاش موارد .. وكمان ده بياخد وقت كبير اوي علشان يعوض الموارد او تسدد الديون .. وغالبا الحل ده لا بيعوض موارد ولا بيسدد ديون .. لان بيبقا فيه مشكله هيكليه ف الاداره بتغك الدنيا .. حتي لو فيه ديموقراطيه .. الديموقراطيه ممكن تحسن شويه اداء الشركات دي .. يعني يبقا فيه فصل ما بين السلطات .. ف يبقا فيه هيئات رقابيه بتراقب اداء الحكومات ف اداره الهيئات دي ..لكن برضو لان الموظف عارف انه اخر الشهر هياخد مرتبه ف بيانتخ .. وكمان الشركات دي بتتحول ل حظيره بتعبي فيها الحكومه ف مواسم مختلفه .. عندك انتخابات ف نسبه البطاله زايده وعاوز تنزلها ؟ عبي ف القطاع العام .. عندك ناس غضبانه وعاملين ليك وجع دماغ ؟ عبي ف القطاع العام .. عندك ناس حبايبك بقا وعاوز توجب معاهم ؟ عبي ف القطاع العام .. ف للاسف بيتوجب عندك نوع من البطاله المقنعه وبيكترو اهل الثقه علي حسب اهل الكفائه .. ضيف كمان علشان ان الدوله تضمن ان كل حاجه ماشيه زي م هيا عايزه ف الاداره بتبقا مركزيه جدا .. وحركه الهيئات دي بتبقا بطيئه جدا وتقيله اوي .. ف مش بتقدر تواكب تغييرات السوق .. ف النتيجه انها بتفشل وتفلس وبتتخصص هيا كمان .. الجل التاني هو التاميم .. تاميم شركات موجوده اساسا .. وللاسف التاميم بيجمع ما بين السوئتين .. السوئه الاوله الضعف الاداري بتاع القطاع العام الي اتكلمت عنه من شويه .. والسوئه التانيه الظلم الي بيحصل لاصحاب الشركات والرعب الي بيحصل لاي حد يفكر انه يستثمر ف البلد دي .. وانا ايه الي يخليني استثمر فلوسي ف بلد ممكن تقلبها مني ؟ لا يعم الله الغني .. ف النتيجه ان المستثمرين بيهربو والسلعه والخدمات جودتها بتقل .. ف ساعتها لو القطاع العام محتكر السبوبه دي ف الجوده بتنزل والمشتري هو الي بيتسحل .. ولو فيه منافسه ف القطاع العام مش بيقدر يلاحق والقطاع العام هو الي بيتسحل ..

    وللاسباب دي الدول الاسكتندافيه ودول شمال اوروبا تخلت تماما عن فكره الاقتصاد المخطط وأمنت تماما بفكره السوق الحر .. لدرجه ان حريه الاقتصاد عندهم حسب مؤسسه (Heritage) ترتيبهم الدنمارك 12 والسويد 15 .. ف الوقت الي امريكا ام السوق الحر كان ترتيبها 18 من اصل 180 دوله .. الدنمارك والسويد الي المفروض انهم اشتراكيين ترتيبهم ف مؤشر حريه السوق اعلي من امريكا ام الراس ماليه ... بس زي م قولنا بيقلبو فلوس من الاقتصاد ده ب ضرائب تصاعديه عاليه جدا علشان يعملو دوله الرفاه تعليم وصحه ومعاشات .. خلاص كده الهدف الاول تخلينا عنه نيجي بقا للاهداف التلاته الباقيه

    • اعاده توزيع الثروات

    • توفير دوله الرفاه

    • مراعاه حقوق العمال

    حاجه جميله جدا لما الدوله تقدملك الرفاهيات و تدلعك وتهشتكك .. وتوفرلك فلوس وصحه والتامينات وصحه ومعاشات لما تتقاعد وتتدعملك المنتجات ب اسعار مخفضه .. بس فيه مشكلتين ف الكلام ده .. كل م هيزيد الدلع كل م هنحتاج نزود ف الميزانيه ف السؤال الي بيطرح نفسيه هنا هنجيب الفلوس دي منين ؟ اما الدوله يكون عندها موارد .. بترول او دهب او معادن .. وعندها فلوس كتير ف تصرف بيها وتدلع .. او تفرض ضرائب ع الناس او تستدين .. لو عندها موارد ف الموارد هيجيلها يوم وتخلص .. وتبداء ساعتها تفرض ضرائيب .. فعليا اكتر دول مدلعه شعوبها هيا اكتر دول مقلبه شعوبها ضرائب .. طب م هو حلو احنا كل شويه نزود الضرايب ع الاغنياء اصحاب الشركات ونزود الدلع ل غالبيه الشعب ف نرضيهم ونضمن صوتهم ف الانتخابات والحياه هتبقا زي الفل .. المشكله دلوقتي هتبقا ف كفه الميزان التانيه بتاعت اصحاب الشركات .. لما الدوله بتزود الضرائب ع الدخل الي بتوصل ل 60 % ف دول زي السويد والدنمارك ويزودو انحيازهم للعمال بشكل مبالغ فيه .. الشركات بتقولك يعم بلاها الدول دي ويروحو يفتحو المصانع ومقر شركاتهم الرئيسيه ف بلاد مفيهاش ضرايب كتير ولا المبالغه ف حقوق العمال .. يبقا كده الاشتراكيه جات تحلب الشركات .. قامت الشركات سابتهم وخلعت .. وده بالظبط الي حصل ف عهد اولاند رئيس فرنسا الاشتراكي الي عمل قانون يخلي رفد العامل حاجه شبه مستحيله وتعيينه شيء مكلف جدا والضرائب اصلا عاليه جدا ف النتيجه ان 60 الف مليونير هربو ب فلوسهم من فرنسا بسبب القانون ده والاقتصاد الفرنسي ساعتها لبس ف الحيط لان نص موارد الدوله تقريبا معتمده ع الضرائب الي بتلمها من الاغنياء والبطاله وصلت ل 10% الي هيا ضعف المانيا وبريطانيا .. وشعبيه اولاند عند الشعب ( الشعب الي اولاند كان خايف عليه ) نزلت ل 26% .. السويد كمان بتعاني من نفسه المشكله .. شركه (IKEA) سابت السويد ف السبعينات لنفس السبب لدرجه ان المقر الرئيسي للشركه السويديه موجود ف هولاندا .. ف النسبه الاكبر من صرائب الشركه السويد مبتشوفش منها حاجه .. وده الي خلي الحكومه السويديه تبدا تقصص ف الضرائب وتبدا تقلل ف الانفاق علي الدلع علشان تشجع الاستثمار انه يرجع تاني للبلد والكلام ده شرحه بيحصل كمان ف الدنمارك .. ف هنا ي معلم بيبقا الميزان .. ازاي بيبقا فيه بيئه وقوانين وتسهيلاات تشجع الناس انها تعمل مشاريع ف البلد تشغل فيها الشعب ويبقا فيه جزء محترم من الربح بيرجع ل البلد تاني تقدم بيه خدمات ل عامه الشعب . وتصرف بيه ع الي مش قادر .. ومع كده تحمي حقوق العمال ف انهم ياخدو اجازات ومرتبات وتعيشهم عيشه كريمه .. ومش للدرجه الي تخليهم يانتخو وميشتغلوش .. ويفضلو الي بيحكمو عينهم ع الطبخه دي .. يشيل من ده شويه ويحط ل ده شويه .. علشان تفضل ملحها مظبوط ومتبوظش .. ولو باظت الشعب بيشيلهم ويجيب ناس تانيه يحاولو يظبطوها

    ف النهايه ان الاشتراكيه مثال حي ل الي بنقوله دايما ان العبره بالتنفيذ .. زي م شوفنا اكثر الدوله ف مؤشر السعاده والرفاهه بيقولو ع نفسهم اشتراكيين .. زي السويد والنرويج وفنلندا .. وعلي النقيض اتعس دول زي فنزويلاا مثل برضو بيقولو ع نفسهم اشتراكيين .. والسؤال دلوقتي هو هل تفتكرو النظام الاشتراكي ينفع ف بلادنا الجامده زوحليقه دي ؟ ولو لا ليه مينفعش ؟

    اسف اني طولت جدا ف الموضوع بصراحه بس حبيت اشرح الامر بالتفصيل رغم ان شرحي ممل 😄 وحابب اشكر الراجل الي قطع النور وخلاني اعيد الموضوع من الاول تاني وتحيا بلادنا العربيه الجامده زوحليقه 😄



  • موضوع حميل
    وااصل


  • Arabic Moderator

    @mazzikaua74
    يجب أخذ الاذن اولاً
    من هنا


  • Banned

    ماعرف اذ تستقبل النقد او لا
    بس الغالي الحين المواضيع الكبيره مالها معنى ، مستحيل شخص يقرا كل هذا الكلام بيشعر بالملل

    الواضح لي بعض الاسطر من كتابتك وهذا شي طيب ، بس لو تقتصر المواضيع تكون افضل واميز



  • @mcfc_uae169

    نعم انا لم اقراه كله انا قرات ربعه😂



  • افضل المواضيع ما قل و ذل



  • @mcfc_uae169 مهو انا من طبعي اني مش بعرف الخص والله :"D
    بس ف كل الاحوال هحاول حاضر .. تسلم ع النصيحه ي برو !

    @bndralblwshy12345 said in ( الاشتراكية ):

    @mazzikaua74
    يجب أخذ الاذن اولاً
    من هنا

    حاضر اوعدك هبقا اخد الاذن المره الجايه باذن الله !


  • Arabic Moderator

    @mazzikaua74
    هذه سلسلة يجب اخذ الاذن مرة اخرى


  • Arabic Moderator

    رغم عمل الإشتراكية لكنها سيئة جداً .وتحفز على الأمور اللاأخلاقية كالرشوة .

    وتعمل على فساد المجتمعات حسب رأيي , المهم الجزائر منذ 1962 إلى 1991 كآنت تعيش واقع سيء .

    ولولا تغيير النظام الإقتصادي لهلكنا . شكراً أحمد موضوع جميل



  • @marccinho مهو انا قولت ي برو ان الاشتراكيه مش بالاسم !
    علي سبيل المثال حزب عبد الناصر المنقلب علي الملك فاروق كان اسمه الحزب الاشتراكي .. الجنيه المصري بعد م كان ب 3 دولار بقا ف عهده الجنيه المصري = 1 دولار ..
    بالنسبالي بعد م قريت الشيوعيه والاشتراكيه والنيوليبراليه ف الي ينفع ف بلادنا التعيسه دي هيا الاشتراكيه 😄 .. شكرا ل ابداء وجهه نظرك .. !



  • و عليكم السلام

    طبعا مستحيل اقرء كل هذي الجريدة
    خاصة أنها مش مرتبة

    بس قرأت الردود

    وحبيت اقلك أنه الإشتراكية مشابهة بالشيوعية او ممكن نعتبره جزء منها، وهذا النظام 'الملحد' ما بيرحموا فيه المسلمين وصعب تكون مسلم تحت هذا النظام الذي يعتمد على قوة الجندي و صرامة القانون
    نظام فاشل جدا فكريا و عمليا و كلشيا

    تخيل لو أنت مثلا عندك مصنع سيارات ، وعندك 3 اولاد كل يوم بتصنع 100 سيارة و شخص آخر أيضا عنده 3 اولاد يصنع 5 سيارات يوميا .. وتاخذوا نفس الراتب ! وبعدها تشوف شخص عنده 5 اولاد وكل يومين بصنع سيارة وبياخذ راتب أكثر منكم .. طبعا هون ما في اشي يجبرك تشتغل 100سيارة .. بتصير أقل و أقل حتى يتم قتل الإبداع بكل الدولة


  • Arabic Moderator

    @mazzikaua74 ما رح نقدر ع الرأسمالية 🙂



  • موضوع ممتاز