*من غير راس*



  • ⬅ قامت من النوم .. دخلت الحمام .. بصت في المرايه .. ملأتش راسها !!! خافت .. اترعبت .. جريت علي اوضه مامتها عشان تصحيها ...
    -"ماما .. ماما ! .. قومي بسرعه "
    -" خير يا بنتي .. فيه ايه ؟! "
    -" ! انا مش لاقيا راسي ! "
    -" طب اهدي ,,, اهدي و أنزلي دلؤتي شغلك و لما ترجعي نبقي ندور عليها بهدوء "
    -"يا ماما بقول لك راسي !! "
    -" يا حبيبتي سمعتك من اول مره , بس ينفع دلؤتي تنزلي عشان متتأخريش علي شغلك , و خطيبك ميفضلش مستنيكي ؟؟ , و لما ترجعي نبقي نشوف موضوع راسك ده .. , ادخلي دلؤتي البسي و انزلي و لما ترجعي نبقي نشوف الموضوع ده "
    .. دخلت اوضتها , متوتره , قلقانه ! ازاي ده حصل ؟! , بس سمعت الكلام , لبست هدومها , نزلت لخطيبها , دخلت العرابيه .... خطيبها اول ما اشفها اتصدم !!!
    -"ايه ده !؟؟ "
    -"و الله ما عارفه ازاي ده حصل يا حبيبي !! انا صحيت من النــ "
    -" ازاي مش عارفه ؟!! .... ايه اللي انتي لابسه ده ؟! "

    • " نعم !! و هو كل اللي لفت نظرك فيا !! ,, لبسي ؟! مفيش حاجه تانيه شكلها غريب فيا ؟؟! "
      -"غريب ايه و زفت ايه ؟ يلا اطلعي بسرعه غيري و البسي حاجه غير اللبس ده "
      -"انا لبسي كويس , و مش حغيره!! و كنت متوقعه تركز في حاجه تانيه اهم من لبسي ! زي راسي مثلا ؟!! "
      -" اهم من لبسك ؟!! و الله معتقدش ان في واحده محترمه نازله الشارع حيبقي عندها اهم من لبسها عشان تركز فيه !! غير بقي لو نازله عشان يتحرشوا بيها او يغتصبوها !!
    • "حسن اسلوبك في الكلام معايا لو سمحت "
      -" هو ده اسلوبي , و للاسف مش حينفع تركبي معايا بالمنظر ده , مش حقبل اسمع كلمه مش لطيفه من شخص قذر , عشان خاطر لبسك !! "
    • "و انا مش حخليك تتعرض للكلمه اللي مش لطيفه ديه , عن اذنك ! "
      ... نزلت من عرابيته و استنيت تاكسي .. كان كل اللي رايح و اللي جاي يبص عليها باستغراب , في الاول هي تخيلت ان السبب هو راسها اللي مش موجوده , بس لما ركزت في نظراتهم و عيونهم ادركت ان السبب عمره ما كان راسها , محدش اساسا بص مكان راسها , محدش اصلا مهتم براسها او فارق معاه تكون براس و لا لأ ! ,, كله كان مركز في باقي الجسم اللي تحت الراس , ده بالنسبه لهم اهم بكتير !! .. فجأه لاقيت عربيه وقفت قدامها .. و حد بيناديها بالاسم ....
      -"ايه يا بنتي مش فاكرني ؟؟ انا صاحبتك من ايام المدرسه , اركبي اوصلك معايا في الطريق "
    • "شكرا "
    • ياااه , عاش من شايفك .... بس انتي شكلك اتغير اوي "
      -"ايوه فعلا !! في ايه بقي متغير فيا ؟؟! "
      -"انتي مش بتشوفي نفسك في المرايه قبل ما تنزلي و لا ايه ؟؟ "
    • "ايوه شفت !! انتي قصدك راسي , صح !!؟ "
      -"راس ايه يا بنتي ؟؟ لا انا بتكلم انك طختني اوي , انتي مكنتيش كده زمان ! لازم تخسي جامد , اصلك بعد الجواز حتبوظي اكتر ! و جوازك ساعتها يخلع منك "
      -" طب و راسي عادي بالنسبه لك ؟؟ "
      -" انتي قصدك علي الحجاب يعني ؟؟, بصي لو جوزك عاوز يحبجك , اتحجبي و ريحي دماغك "
      -" لا انا قصدي راسي !!! هي موجوده ؟!"
    • "يا بنتي متكبريش الموضوع , اه عارفه انها راسك و بتاعتك و حريتك و الكلام ده , بس انتي بتتكلمي مع مين , راسك بعد الجواز حتبقي راسه , جسمك حيبقي جسمه , كل حاجه فيكي حتبقي بتاعته .. فوفري علي نفسك كلام ملوش لزمه و اسمعي كلامه و خلاص "
      ... وصلت شغلها و هناك قابلت زميلها اللي معروف عنه تضامنه مع المرأه و حقوقها ..
    • " ايه يا بنتي ؟؟ شكلك متضايقه انهارده , فيه ايه ؟؟ "
      -"هو انتا مش ملاحظ اي حاجه غريبه فيا ؟؟ "
      -"اه ملاحظ .. شكلك متضايق , قول لي من ضايقك علي الصبح ؟!
    • "يعني انت شايفني شكلي طبيعي !!؟؟ "
    • " مدام بتقولي شكلي !! يبقي في واحد متخلف رجعي ضايقك بكلمه سافله زيه عشان لبسك ! صح ؟؟
    • " لا خلاص .... متاخدش في بالك "
    • " يا بنتي ده مجتمع ذكوري متخلف , متسمحيلهومش يتحكموا في مظهرك و جسمك !! ألبسي و اعملي كل اللي انتي عاوزه .. لو اتمكنوا من جسمك حينتصروا "
    • " طيب "
      .. خلصت شغلها ... وصلت البيت , دخلت اوضتها , قفلت علي نفسها , دمعت شويه , حزنت شويه , اتقهرت شويه , و فضلت تفكر هما ليه كلهم ركزوا مع شكلها , جسمها , لبسها ؟؟ ليه محدش فكر يرفع عينه شويه يشوف راسها !؟! .. ليه كلهم تعاملوا معاها وكأن الطبيعي ان الواحده تبقي من غير راس او كأن راس الواحده رفاهيه ممكن تستغني عنها !!؟ .. و من التعب قررت تنام , اصل النوم بيريح .. بس مشكله النوم ان راحته مش بتدوم , و مهما نامت مسيرها تصحي .. و فعلا صحيت عشان تلاقي نفسها لسه برضه من غير راس ! .. بس المره ديه قررت تكمل يومها عادي خالص , مزعقتش عشان مامتها تكمل نوم براحتها , لبست واسع عشان خطيبها ميتضايقش , مشيت علي دايت كويس عشان تعجب الناس , حتي عشان تحارب المجتمع الذكوري مش محتاجه راسها , كفايه جسمها !! و ادركت اخيرا ان قيمتها في المجتمع ملهاش اي علاقه بالراس .. مرت الايام و ابتدت تتأقلم مع واقعها الجديد .. اتجوزت من غير راس .. جابت عيال من غير راس .. و عجزت كمان من غير راس ,,, لغايه ما في يوم مشمس طبيعي جدا , لاقيت جوزها بيعبط .. ولادها بيبكوا , بناتها لابسين اسود ... لاقيت جنازه كبيره بأسمها .. و ناس جايه تعزي فيها ... فضلت تصرخ و تقول "انا مش ميته !! .. انا صاحيه اهو ... ايدي اهي بأشيل بيها الكوبيات و بأعمل بيها الاكل .. رجلي بأوقف عليها اغسل المواعين و انضف الشقه .. جسمي اهو بيتحرك و بيعمل كل اللي انتوا عاوزينه ! انا مش ميته يا جماعه .. مش ميته "
      .. بس لا حياه لمن تنادي ... و زي ما زمان مشفوش راسها , دلؤتي مشفوهاش كلها ! ... و اعنلوا ان كفايه عليها حياه لحد كده , خلاص خدمت في منظومتهم بما فيه الكفايه , و زي اي ألة او جهاز لما تخلص وظفته يبقي مات !! ,,, مع انها في الحقيقه ماتت قبل كده بكتير ,, ماتت لما اول مره صرخت و محدش سمعها , ماتت لما اول مره اشتكت و محدش اهتم , ماتت لما اول مره اتنازلت و محدش خد باله !! ... , ماتت لما اختارت تعيش بقوانينهم و تلغي حلمها , لما تعيش بمزاجهم و تدفن عقلها , لما تعيش بعادتهم و تقالدهم اللي فرضت عليها شكل غير شكلها ,,,, ماتت لما اختارت تكون زي كتير غيرها عاشوا من غير راس .. زي كتير غيرها حياتهم كانت بس جسمهم , شكلهم , مظهرهم .. زي كتير غيرها دخلوا الحياه مايتين و خرجوا قبل ما يموتوا ... ماتت لما نامت , لما خافت , ماتت لما استسلمت .. ماتت لما تخيلت لو في لحظه انها تقدر تعيش , من غير راس ... !!
      بقلم / محمود سويد


  • موضوع رائع

    !!!!!!!!واصل





  • السلام عليكم ورحمـة الله وبركـاته
    قصة مؤترة و مشوقة والأروع في ذلك انها من قلمك ، بس مش متفق معـاك , الإنـاث برأيي لازم يلتزموا بملابس ماتثير شهوة الرجـل . وفعـلا ماتهتم للغير لما يقولوا لهـا ايه اللباس دي ، اهم شيئ تلتزم بتعليمـات الدين الإسلام لو كـانت فعـلاً مسلمـة .
    قصـة طويلـة ومن قلمك مااقدر اوصف ليك ، قصـة مشوقة و خلاتني احس انهـا فيلم ، سلمت يداك 👏 .



  • @ᗷiǥ-ᗷᗩǥi مرورك الاجمل ي كابتن


  • Banned

    @xxxxxx_98
    قصة رائعة اخي سويد و الاروع انها من قلمك💯
    (سلمت يداك) 👏



  • @كسامي1 تسلم اخى مرورك الاروع



  • إيه الجمال ده كله يا سيادة المتر محمود سويد .... روعة و الله يا أستاذ يا كبير



  • @محمد-احمد-اهلاوي انت الاروع ي دكتور ومروك الاجمل



  • قصة رآئعة وجميلة وقلمك مبدع الصرآحة

    الإسلام ديننا علينا بإتباع أوامره وإجتناب نواهيه ، فهو دين رسولنا محمد و ملة أبينا إبراهيم

    فعلينا إتباع ذلك في كل شئ كبيرة أو صغيرة كاللباس مثلاً لكي لا تجلب الفتاة إليها فتنة الرجال

    أحسنت الإختيار ، ولكل ذي حق حقه ، فعلينا تكريم المميزين على جهودهم

    alt text



  • موضوع مميز الصراحة شكرا لك عليه



  • @hashim-mohamed-club شكراااا كابتن ... مرورك اروع واميز 💜



  • @mahraz-dz شكرااا حبيبي 💜



  • جميل جداََ ,,



  • @siir-nabilovič مرورك الاجمل



  • روعة يا اسطورة



  • @anas-ouassal مرورك الاروع